“Bakı Abadlıq Xidməti” tərəfindən paytaxtın mərkəzində işıqlandırılmış küçələr Novruz bayramı ilə əlaqədar bərq vurur. İslam Səfərli, Bəşir Səfəroğlu, Lev Tolstoy, Əlövsət Quliyev, Mirzə İbrahimov, Həzi Aslanov və digər küçələrə quraşdırılan LED işıqlarlar şəhərin gecə mənzərəsini daha da möhtəşəm edir.

Əsas missiyası Bakı kəndlərini abadlaşdırmaqdan ibarət olan “Bakı Abadlıq Xidməti” baharın gəlişini xüsusi coşquyla qeyd edib. Xidmətin əməkdaşları axır çərşənbədə Əmircanda bayram təşkil ediblər. Şənlik hazırlığından xəbər tutan kənd camaatı axın-axın meydana toplaşıb. El adətiylə tonqal qalayıb, üstündən atlanıblar. Səsli-küylü davulçular, milli geyimli gənclər, yumurta döyüşdürən uşaqlar, şən musiqi xonçalı Novruzun axır çərşənbəsinə xüsusi rəng qatıb. Gənclər birlik olub yallı gediblər. Tədbirə qatılanlar mehribanlıqla bayramlaşıb arzu-niyyətlərini dilə gətiriblər. Neçə-neçə gözəl bayramlara!

İslamabadda Azərbaycan Abadlıq Layihələri

Pakistanın paytaxtı İslamabadda həyata keçirilən dörd böyük layihə “Bakı Abadlıq Xidməti” MMC-yə həvalə edilib.

1. Konqres Mərkəzinin müasirləşdirilməsi – 1997-ci ildə istifadəyə verilən mərkəzin ətrafında müasir dizayn və yaşıllaşdırma işləri aparılacaq.

2. Şrinaqar şossesində abadlıq – 25,5 km uzunluğundakı əsas magistral yol boyunca yaşıllaşdırma layihələri icra olunur.

3. Melody Food Park – Bu ərazi istirahət və əyləncə məkanına çevriləcək, kiçik biznes obyektləri bərpa ediləcək və turistlər üçün cəlbedici məkana çevriləcək.

4. Seyidpur kəndinin yenidən qurulması – Tarixi memarlıq qorunmaqla kəndin infrastrukturu yenilənəcək, su və sanitariya sistemi yaradılacaq, yerli sakinlər üçün təlimlər təşkil ediləcək.

Bu layihələr İslamabadın inkişafına töhfə verməklə yanaşı, Azərbaycan-Pakistan əməkdaşlığını daha da möhkəmləndirəcək.

Bakı Abadlıq Xidmətinin Laçında qurduğu “Aydınoğlu” fabriki istehsal gücü və məhsullarının keyfiyyəti ilə nəinki Qarabağ bölgəsini, bütün ölkəni mebellə təmin etməyə hazırdır.

Əsasən, yerli sakinlərin çalışdığı fabrikdə müasir texnologiyalarla yüksək standartlara uyğun mebellər düzəldilir və hər növ sifarişlər qəbul edilir.

Ev, ofis, restoran, hotellər üçün mebel dəstləri hazırlanır, həmçinin məkanların interyer dizaynı üzrə bütün dekorasiya işləri peşəkar ustalar tərəfindən həyata keçirilir. 

Sifarişə uyğun olaraq istənilən tərz və üslubda, zövqlü və funksional mebellər hazırlanaraq təqdim edilir.

Pakistan İslam Respublikasının Baş naziri Məhəmməd Şahbaz Şərifin Azərbaycana dövlət səfəri çərçivəsində fevralın 24-də Bakıda biznes-forum təşkil edilib.

Azərbaycan Respublikasının Prezidenti İlham Əliyev və Məhəmməd Şahbaz Şərif biznes-forumda çıxış ediblər.

Forumda iştirak edən “Bakı Abadlıq Xidməti” MMC-nin baş direktoru Bünyad Qasımov rəhbərlik etdiyi qurumun Pakistanın paytaxtında həyata keçirdiyi təmir-bərpa layihələri barədə məlumat verib. Qeyd edib ki, “Bakı Abadlıq Xidməti” tərəfindən İslamabadda icra olunan layihələrdən biri yekunlaşıb, üç layihə üzrə isə işlər davam edir.

Uzun illər ətrafdakı qəsəbələrin tullantı və çirkab sularının axıdıldığı Bülbülə gölü tezliklə təmiz, abad, göz oxşayan istirahət məkanına çevriləcək.

Əmircan, Bülbülə, Bakıxanov və Qaraçuxur qəsəbələrindən gündəlik 25 min kubmetr çirkab sularının axıdılması nəticəsində göldə və gölətrafı ərazidə xoşagəlməz vəziyyət yaranmışdı. Çirkab suların axıdılması, şübhəsiz, əhalinin sağlamlığına da təsir edirdi. Bülbülə gölü ekoloji fəlakətə çevrilməsin deyə Bakı Abadlıq Xidməti ərazidə əsaslı və planlı təmir işlərinə başlayıb. Gölün ətrafındakı qamışlıq tamamilə qurudulub, tullantılar təmizlənib. Bu isə havadakı üfunəti məhv edərək natəmizliyin və həşəratların kökünü kəsib. 

Laçında açılmış Naxışlı Tikiş Evi öz təkamülünün növbəti mərhələsinə qədəm qoyur. Artıq müəssisə gündə 200-dən çox sifariş qəbul etməyə hazırdır. Ən keyfiyyətli məhsullar və istənilən naxış seçimi ilə müştərilərə xidmət göstərilir.

Bu inkişaf Qarabağda fəaliyyətə başlayan otellər, qonaq evləri, turizm obyektləri və digər müəssisələr üçün yeni imkanlar yaradır. Ağıllı texnologiyalar və peşəkar yanaşma sayəsində hər bir sifariş dəqiq və keyfiyyətli şəkildə yerinə yetirilir.

İctimai TV-nin “Xəbəriniz var?” verilişində Bakı Abadlıq Xidmətinin  paytaxtda, Bakı kəndlərində və Laçında həyata keçirdiyi abadlıq işləri müzakirə olunub. 

“Bakı Abadlıq Xidməti”nin İctimaiyyətlə Əlaqələr Şöbəsinin rəhbəri Lalə Əliyeva deyib ki, ərazilərimiz işğaldan azad edildikdən sonra Laçında genişmiqyaslı yenidənqurma və abadlıq işləri görülüb. Hazırda Laçında yolların, parkların və ictimai məkanların yenidən qurulması həyata keçirilir, yeni müəssisələr açılır və iş yerləri yaradılır. 

Zəfər günü Azərbaycan Respublikasının Prezidenti İlham Əliyev dünyanın ən böyük bayrağını yenidən Bakı bulvarındakı tarixi məkanda - Dövlət Bayrağı meydanında ucaltdı. 

Bayrağın ucaldığı məkanda əsaslı abadlıq işləri görülüb. Meydan tamamilə işıqlandırılıb. Əraziyə 52 işıq dirəyi basdırılıb, 102 ədəd Phillips istehsalı olan lampa yerləşdirilib. Meydanda həmçinin yaşıllıq və landşaft işləri də görülüb. 4500 kvadrat metrlik sahəyə qazon döşənib. Xüsusi dizayn olunmuş yerlərə 54 min müxtəlif kol və çiçək əkilib.

Prezident İlham Əliyevin Pakistana səfəri çərçivəsində Baş nazir Məhəmməd Şahbaz Şərifə İslamabadın abadlaşdırılması planı təqdim olunub.

Məhəmməd Şahbaz Şərif: “Biz bu cür planları bəzən İstanbuldan nümunə götürürdük, indi isə Bakıdan nümunə götürürük. Heyətin rəhbəri bu fürsətdən istifadə edib İslamabadı Bakıya oxşadacaq”.

Prezident İlham Əliyev, birinci xanım Mehriban Əliyeva, qızları Arzu Əliyeva mayın 28-də Xocalıda Bakı Abadlıq Xidməti tərəfindən aparılan abadlıq və yenidənqurma işləri ilə tanış olublar, şəhərə köçən sakinlərə mənzillərin açarlarını təqdim ediblər.