Zabitlər parkı

 Zabitlər prarkının ərazisi əvvəllər demək olar ki, ancaq qumdan ibarət olub. Rekonstruksiya zamanı münbit torpaq gətirilib, bitki örtüyü daha da zənginləşdirilib. Parkın yeri və divarlarına isə xaricdən gətirilmiş daşlar döşənib. Buradakı mühit insanı məftun edir – çoxillik ağaclardan ibarət sıx, yaşıl divarlar parkın qədimliyindən xəbər verir. “Zabitlər”dəki zeytun ağacları da elə həmin vaxtdan qalıb. 2009-cu ildə 4 hektar ərazisi olan parkda yenidənqurma işləri həyata keçirilib. Bağdakı çoxillik ağacları saxlamaq şərtilə burada əlavə yaşıllaşdırma işləri olub. Parkda yeni işıqlandırma sistemi quraşdırılıb, sakinlərin istirahəti üçün müxtəlif guşələr yaradılıb.  Yerli mütəxəssislər tərəfindən yeni daş fontan tikilib. Parkda həmçinin, yumşaq döşəməli xüsusi hazırlanmış uşaq meydançası var, xarici görünüşü və orijinal forması ilə diqqət çəkən restoran da fəaliyyət göstərir. Yenidənqurma işlərinin bitməsindən 3 il keçsə də, park nəinki aktuallığını və məşhurluğunu itirmədi, əksinə, insanların ən çox istirahət etdiyi məkanlardan birinə çevrildi. Paytaxtın mərkəzinə yaxın, hündür binaların, nəqliyyat axınının arasında, işgüzar şəhərin gərginliyi və təlaşı içində bütün yaş kateqoriyasına aid sakinlər üçün ideal istirahət məkanıdır. Parkın bir tərəfində hündür binalar, digərində isə məscid – sanki bir şəkildə həm müasir, həm də tarixi Bakı əks olunub.

Paytaxtdakı ən böyük və ən qocaman yaşıl məkanlardan biri olan “Zabitlər” parkında əsasən, çoxillik ağaclar – sərv, yapon soforası, Eldar şamı, zeytun, qovaq, yapon əzgili bitir. Hündür ağacların yaratdığı kölgəlik çox olduğundan burada güllər nisbətən azdır. Buna baxmayaraq, azaliya, pelarqoniya, bənövşə parkdakı yaşıllığa rəng qatır. Meyvə ağaclarından İtaliyadan gətirilən albalı, heyva və tut ağacı bitir. Baş bağban Yaqub bəyin sözlərinə görə, ağacların yuxarıya doğru boy atması üçün aşağıdan budayırlar. Yandan çıxan budaqlar kəsilmədikdə ağac əyilir və tez qırılır. Parkdakı ən qədim ağaclardan biri olan daş palıdın 60-70 yaşı var. “Zabitlər” parkında əkilən bitki çeşidi arasında ənənəvi ağac və kol növlərindən istifadə olunub. Həmişəyaşıl daş palıd cərgələri və hasarı əvəz edən xüsusi kəsim verilmiş şümşad diqqəti cəlb edir. Bu bitkilər şam və sərv ağacları ilə ahəng təşkil edir, ilin bütün fəsillərində xoş təəssürat yaradır.

“Zabitlər” parkının adı Foto Arxivdə olan mənbələrdə 1940-cı ilə kimi Sovet Ordusu parkı, 1933-cü ilə qədər olan fotosənədlərdə isə Qızıl Ordu parkı kimi qeyd olunub. Böyük Vətən Müharibəsi illərində isə park qəhrəmanlar və faşizmə qarşı döyüşlərdə həlak olanların xatirəsinə həsr olunub. Müharibədən sonra parkın adı dəyişdirilərək iki dəfə Sovet İttifaqı Qəhrəmanı olmuş Həzi Aslanovun şərə-finə adlandı. Arada “Durnalar” və “Pionerlər” parkı kimi də adlanıb. Lakin hər kəs parkı “Zabitlər” adı ilə tanıyıb.