Qafur Məmmədov adını daşıyan parka “Bayıl bağı” da deyirlər. Sakinlərin sevimli istirahət məkanıdır. Körpələr, uşaqlar bu sakit parkdakı yaşıllıqda təmiz hava alırlar, əylənirlər.

"Bakı Abadlıq Xidməti" də xüsusi diqqət edir ki, parkın səliqə-sahmanı pozulmasın. Vaxtaşırı yeni ağac və çiçəklər əkilir, bitkilərə mütəmadi qulluq göstərilir. Daş döşəmələr hər gün yuyulur. Suvarma və təmizlik işləri parkın baxımlı qalmasını təmin edir.

Bütün bu işlər ərazinin ekoloji baxımdan sağlam, oksigenlə zəngin bir məkana çevrilməsinə xidmət edir. Sakinlərin rahat və xoş istirahəti üçün parkda hər cür şərait yaradılıb.

Bu gün Xətai parkında geniş iş gedir. “Bakı Abadlıq Xidməti”nin əməkdaşları qocalmış, vaxtı ötmüş ağacları yeniləri ilə əvəz edirlər. Baxın, bu dekorativ leylandiya ağacıdır. Uzunömürlü olub, qocalırlar və görkəmlərini itirirlər.

Bakı küləklər şəhəridir. Vaxtı ötmüş və qocalmış ağaclar küləyə davam gətirmir, qol-budaqları qırılır. Bu isə çox təhlükəlidir. Biz vaxtaşırı görkəmi itmiş və qocalmış ağacları kəsirik və yerinə yenisini əkirik. Bu yeni ağaclar parka yeni nəfəs və təmiz hava gətirir.

Bizim şüarımız dəyişməzdir – bağa baxarsan, bağ olar. Bağlara baxacağıq ki, Bakını yaşıl şəhərə çevirə bilək.

Bakının sevilən istirahət guşələrindən biri olan Puşkin parkında mövsümi abadlıq və təmizlik işləri görülür. “Bakı Abadlıq Xidməti”nin əməkdaşları gün ərzində park ərazisində yaşıllıqların qorunması və abadlaşdırılması istiqamətində çalışırlar.

Parklara qulluq prosesində onlar bitkiləri mütəmadi olaraq budayır, gübrələyir, suvarır və alaq otlarından təmizləyirlər. Budamadan öncə ağac diqqətlə yoxlanılır, kəsilməsi vacib olan budaqlar müəyyən edilir.

Müxtəlif növ ağaclar fərqli böyümə sürətinə malik olduqları üçün budama işləri fərdi yanaşma tələb edir. Bəziləri tez, bəziləri isə daha yavaş böyüdüyü üçün hər bir ağaca xüsusi diqqət yetirilir.

Yer Kürəsi Günü münasibətilə Balaxanıda ekotədbir keçirilib. “Bakı Abadlıq Xidməti” və “EkoSfera Ekoloji-Sosial Mərkəzi”nin birgə təşkilatçılığı ilə yaradılmış Ekomərkəzdə və Botanika bağında nadir çiçək toxumları, ağaclar əkilib.

Yer Kürəsi Gününün builki “Bizim Enerjimiz, Bizim Planetimiz” çağırışına uyğun olaraq, tədbirin məhz bu ərazidə keçirilməsi rəmzi məna daşıyır. Balaxanı tarixən Azərbaycan enerji sənayesinin beşiyi olub. Bu gün həmin kənd yaşıl enerjiyə keçidin və ekoloji transformasiyanın simvoluna çevrilməkdədir.

Tədbirə qatılan Oxbridge School-un məktəbliləri üçün Balaxanı sənaye parkına və təkrar emal müəssisələrinə ekoloji ekskursiya təşkil olunub.

Laçının “Zerti” Aqrosənaye Parkında yüksək keyfiyyətli dam örtükləri istehsal edilir. Müasir texnologiyalar əsasında fəaliyyət göstərən müəssisədə hazırlanan dam örtükləri ağırlığa davamlılığı, uzunömürlüyü, istənilən iqlim şəraitinə uyğun olması ilə fərqlənir.

İstehsal zamanı həm yerli, həm də xarici xammaldan istifadə olunur. Bu dam örtükləri Laçın rayonunda inşa edilən bir çox evdə uğurla tətbiq olunub və artq özünü doğruldub. Məhsullar həm fərdi yaşayış evləri, həm də ofis və iş yerləri üçün ideal həll təklif edir.

Müəssisədə istehsal olunan dam örtükrlərini Şərqi Zəngəzur, Qarabağ və Azərbaycanın digər bölgələrinə çatdırılma imkanı var.

Bir il əvvəl “Bakı Abadlıq Xidməti”nin mütəxəssisləri işğaldan azad olunmuş Malıbəylidə yaşıllaşdırma müəssisəsi açmaq qərarına gəldilər. “Bakı Abadlıq Xidməti” 7 hektarlıq ərazini gülüstana çevirib, əkin üçün yararlı vəziyyətə gətirib, istifadəsiz qalmış torpaqlar yenidən canlanıb. 

Bu gün Malıbəylidəki fidanlıqda 300 minə qədər dekorativ bitki var. Müəssisədə çalışan 20-30 bağban hər bitkinin “dilini” bilir. Bitkilərin eləsi parlaq günəşi “sevir”, eləsi küləklə “yola getmir”, eləsi soyuğa, digəri isə istiyə uyğunlaşır. Bitki yetişdirmək yalnız suvarmaqdan ibarət deyil. Bitkilərə mütləq qaydada gübrə verilir, vaxtında budanır.

Bakı Olimpiya Stadionundan Bilgəh qəsəbəsinə aparan yolun təxminən 70 kilometrlik yaşıllıq zolağında “Bakı Abadlıq Xidməti” tərəfindən 15 il ərzində milyonlarla bitki, kol, ağac və ot örtüyü əkilib. İlk illərdə bitkilər Türkiyə, İtaliya və digər Avropa ölkələrindən gətirilsə də, bu gün artıq yerli şəraitdə yetişdirilir.

İqlim və mövsüm dəyişiklikləri nəzərə alınaraq, bitkilər il ərzində mütəmadi olaraq yenilənir. Yaşıllığın qorunması və baxımı üçün “Bakı Abadlıq Xidməti”nin 300-ə yaxın əməkdaşı ərazidə fasiləsiz çalışır. Onların gündəlik zəhməti nəticəsində bu yol göz oxşamaqla bərabər, həm də rahatlıq, təmizlik və zövq örnəyinə çevrilib.

İslamabadda Azərbaycan Abadlıq Layihələri

Pakistanın paytaxtı İslamabadda həyata keçirilən dörd böyük layihə “Bakı Abadlıq Xidməti” MMC-yə həvalə edilib.

1. Konqres Mərkəzinin müasirləşdirilməsi – 1997-ci ildə istifadəyə verilən mərkəzin ətrafında müasir dizayn və yaşıllaşdırma işləri aparılacaq.

2. Şrinaqar şossesində abadlıq – 25,5 km uzunluğundakı əsas magistral yol boyunca yaşıllaşdırma layihələri icra olunur.

3. Melody Food Park – Bu ərazi istirahət və əyləncə məkanına çevriləcək, kiçik biznes obyektləri bərpa ediləcək və turistlər üçün cəlbedici məkana çevriləcək.

4. Seyidpur kəndinin yenidən qurulması – Tarixi memarlıq qorunmaqla kəndin infrastrukturu yenilənəcək, su və sanitariya sistemi yaradılacaq, yerli sakinlər üçün təlimlər təşkil ediləcək.

Bu layihələr İslamabadın inkişafına töhfə verməklə yanaşı, Azərbaycan-Pakistan əməkdaşlığını daha da möhkəmləndirəcək.

Pakistan İslam Respublikasının Baş naziri Məhəmməd Şahbaz Şərifin Azərbaycana dövlət səfəri çərçivəsində fevralın 24-də Bakıda biznes-forum təşkil edilib.

Azərbaycan Respublikasının Prezidenti İlham Əliyev və Məhəmməd Şahbaz Şərif biznes-forumda çıxış ediblər.

Forumda iştirak edən “Bakı Abadlıq Xidməti” MMC-nin baş direktoru Bünyad Qasımov rəhbərlik etdiyi qurumun Pakistanın paytaxtında həyata keçirdiyi təmir-bərpa layihələri barədə məlumat verib. Qeyd edib ki, “Bakı Abadlıq Xidməti” tərəfindən İslamabadda icra olunan layihələrdən biri yekunlaşıb, üç layihə üzrə isə işlər davam edir.

Zəfər günü Azərbaycan Respublikasının Prezidenti İlham Əliyev dünyanın ən böyük bayrağını yenidən Bakı bulvarındakı tarixi məkanda - Dövlət Bayrağı meydanında ucaltdı. 

Bayrağın ucaldığı məkanda əsaslı abadlıq işləri görülüb. Meydan tamamilə işıqlandırılıb. Əraziyə 52 işıq dirəyi basdırılıb, 102 ədəd Phillips istehsalı olan lampa yerləşdirilib. Meydanda həmçinin yaşıllıq və landşaft işləri də görülüb. 4500 kvadrat metrlik sahəyə qazon döşənib. Xüsusi dizayn olunmuş yerlərə 54 min müxtəlif kol və çiçək əkilib.

Prezident İlham Əliyevin Pakistana səfəri çərçivəsində Baş nazir Məhəmməd Şahbaz Şərifə İslamabadın abadlaşdırılması planı təqdim olunub.

Məhəmməd Şahbaz Şərif: “Biz bu cür planları bəzən İstanbuldan nümunə götürürdük, indi isə Bakıdan nümunə götürürük. Heyətin rəhbəri bu fürsətdən istifadə edib İslamabadı Bakıya oxşadacaq”.

Prezident İlham Əliyev, birinci xanım Mehriban Əliyeva, qızları Arzu Əliyeva mayın 28-də Xocalıda Bakı Abadlıq Xidməti tərəfindən aparılan abadlıq və yenidənqurma işləri ilə tanış olublar, şəhərə köçən sakinlərə mənzillərin açarlarını təqdim ediblər.